|
|
 |
|
| .: Turismo |
 |
| A castaña ten gran importacia en Chantada |
| |
A riqueza gastronómica de Chantada, correspóndese coa existente en todo o interior de Galicia; pero cuns elementos claramente diferenciadores, como son o cultivo ecolóxico e a excelencia de fabricación.
Terra de soutos centenarios de inigualable beleza, pero tamén de recentes plantacións cunha importante produción de castañas, que en gran parte procesa unha empresa da zona para conseguir marrón glacé, fariña de castañas, castañas en almíbar… e aproveitando todos os posibles recursos, confeituras de froitos coma as amoras, framboesas, amorodos…
Chantada pode considerarse pioneira na zona en produción de mel con métodos modernos, de feito aquí traballou e deixou o seu grande saber, D. Benigno Ledo González, chamado o cura das abellas, con moitos seguidores que co tempo fixeron posible a produción dun mel de excelente calidade. |
| |
 |
| |
Mención singular, merecen os viños da subzona de Chantada incluídos dentro da Denominación de Orixe Ribeira Sacra, cun carácter especial que lles confire non só a calidade das uvas, senón tamén unha coidada elaboración, unindo as novas tecnoloxías ao mimo dos colleiteiros, auténticos artesáns do viño. Así mesmo, obtéñense uns exquisitos licores e augardentes, elaborados cunha excelente materia prima.
Chantada tamén é pioneira en Galicia na produción de sidra ecolóxica, grazas ó cultivo de mazás sidreiras; das que se extrae sidra natural, achampañada, vinagre… todos eles co selo do Consello Regulador da agricultura ecolóxica de Galicia. |
|
 |
| A cereixa de Chantada é de moi alta calidade |
Orixinalidade claramente definida na produción das galletas mariñeiras chantadinas, outrora o pan dos barcos, agora empregadas na hostalería coma a mellor base para uns excelentes canapés, por poñer un exemplo.
A zona de Chantada é unha gran produtora de cereixa, froito que destaca pola súa altísima calidade, e que se cultiva, maioritariamente, na ribeira.
Así mesmo, é preciso lembrar tamén, produtos tradicionais como a empanada ou a torta de améndoa, nos que a calidade dos ingredientes utilizados é a base para conseguir un bo resultado.
|
|
|
|
